SY GENADE…MY STORIE – Die Ongeforseerde Ritme van Genade
DAG 43 – BELEEF GOD SE GUNS EN TEENWOORDIGHEID ONGEAG VAN JOU OMSTANDIGHEDE
Psalm 139:7-10 [NLV] Waarheen sou ek kon gaan om u Gees te ontwyk? Of waarheen sou ek kon uitwyk om u teen-woordigheid te ontvlug? 8 Gaan ek op na die hemel toe, is U daar; gaan lê ek in die doderyk, dan is U ook daar! 9 Vlieg ek met die daeraad na die ooste, of gaan woon ek in die verre weste, 10 selfs daar sal u hand my lei, en u regterhand my ondersteun.
Heb 13:5 se belofte is dat God se teenwoordigheid altyd met ons op ‘n konstante basis sal wees. God se guns en teenwoordigheid is nie gebasseer op ons uiterlike omstandighede nie. Ons lewe te bewus van omstandig- hede en te onbewus van God se teenwoordigheid in ons lewens. Weet jy vandag dat die Here jou nooit alleen sal los nie? Weet jy vandag dat al gaan jy deur watter omstandighede sal jy altyd kan seker weet dat die Here by jou is.
As jy kan leer om vanuit God se teenwoordigheid in jou lewe te leef en altyd die seker wete in jou hart te hou dat jy nie alleen is nie, gaan jou daaglikse wandel met die Here net soveel sterker wees. Jy gaan minder jouself blootstel aan situasies waar jy skade aan jou verhouding kan doen omdat jy weet dat waar jy ook al is en waarmee jy ookal besig is, sal die Here by jou wees en gereed wees om jou te help, beskerm en te lei. Moenie net as die storms kom die handoek ingooi en sê ek is oorwin nie en God is nie by my nie. Dawid roep dit uit in Psalm 23 “Wanneer ek loop in ‘n baie donker kloof, sal ek nie bang wees nie, want U is naby my. U stok en u staf beskerm en ondersteun my.”
Dis die wete dat ek nooit alleen is wat my nie net help om die storms van die lewe tromp-op te loop nie, maar ook om die krag uit God se teenwoordigheid te put om vas te hou en aan te hou en te wen! In plaas van om bitter te word , hou jou vertroue in die Here. Jou suksesse en wenne is verpak in God se teenwoordigheid in jou lewe en ons moet oefen om bewustelik vanuit hierdie teenwoordigheid te journey. As jy kan oefen om nie te buig voor jou omstandighede nie en bewus te lewe in die teenwoordigheid van die Here sal jy die wenne begin beleef. Wat jy doen vanuit hierdie teenwoordigheid sal voorspoedig wees.
Gebed:
Vader, help my om gedurig bewus te wees van U teenwoordigheid, ongeag van waar in en waar ek myself bevind. Help my asseblief om altyd te onthou dat U by my is en my nooit alleen los nie. Dankie dat as gevolg van U guns in my lewe ek suksesvol in hierdie dag sal wees!
Oordink:
God se teenwoordigheid in my lewe sal my help om suksesvol te lewe ongeag van die posisie of die plek waar ek myself bevind.