Author: admin

ONVERDIENSTELIK
Dag 2

Matteus 9:11 -13 (NLV) – Hoe kan julle leermeester met sulke immorele karakters saameet?” 12 Toe Jesus dit hoor, sê Hy: “gesonde mense het die dokter nie nodig nie; die siekes wel. 13 Gaan leer wat dit beteken as die skrifwoord sê: ‘deernis is vir My baie belangriker as offerandes.’ Ek het gekom om sondaars na die koninkryk te nooi, nie mense wat dink dat hulle alreeds goed genoeg is nie.

Die wat gesond is kort nie ’n dokter nie. Verbeel jou vir een oomblik dat ons in ’n wêreld geleef het waar niemand en niks siek kon word, seer kon kry of kon doodgaan nie. Sou daar ’n beroep wees soos ’n dokter? Beslis nie! Hulle sou nutteloos wees in so ’n wêreld. So is dit ook met die koms van Jesus. Hy het na ons wêreld toe gekom, nie omdat die wêreld gesond is nie, maar omdat dit gebroke en siek is. Dit is juis daarom dat Hy saam met die bystanders, die “outcast” gekuier en tyd spandeer het; sodat hulle gesond kan word en God leer ken. Nie omdat hulle perfek is en dit verdien nie, maar omdat Hy vir hulle lief is.

So is dit ook met ons vandag – God kies ons sonder voorbehoud. Hy het ons gekies lank voordat ons Hom gekies het. Hy het aan die kruis vir ons gesterf, nie omdat ons dit verdien nie, maar uit sy groter genade. So moet ek en jy ook teenoor ander optree. Ons moet vir hulle lief wees en omgee, nie omdat hulle perfek is en al ons “check” bokse “tick” nie, maar omdat ons genade ontvang het.

Dit is wanneer ons besef dat God se genade onverdienstelik is, dat ons met dieselfde oë na ander kyk.

Gebed:
Here, dankie dat ons deur U groot genade gekies is. Help ons om mekaar ook deur U oë te sien.

Liefde Doen:
Neem ’n oomblik en dink aan God se genade in jou lewe. Gaan kyk na jou leefwêreld en vra God om jou te help om anders na die mense rondom jou te kyk, sodat ons kan bydra tot die genesing van die wêreld.

ONVERDIENSTELIK
Dag 1

Markus 5:25-34 – Daar was ook ’n vrou wat al twaalf jaar lank aan bloedvloeiing gely het. 26 Sy het baie gely onder die behandeling van talle dokters en het alles wat sy gehad het, daaraan bestee. Sy het egter geen baat daarby gevind nie; haar toestand het eerder vererger. 27 Sy het van Jesus gehoor en in die gedrang nader gekom en van agter af aan sy klere geraak, 28 want sy het gedink: as ek maar net aan sy klere kan raak, sal ek gesond word. 29 En dadelik het die bron van haar bloedvloeiing opgedroog, en sy kon aan haar liggaam agterkom dat sy van haar kwaal ontslae was. 30 Jesus het ook self onmiddellik geweet dat daar van Hom krag uitgegaan het. Hy het Hom in die gedrang omgedraai en gevra: “Wie het aan my klere geraak?” 31 Sy dissipels het Hom geantwoord: “U sien tog dat die mense van alle kante af teen U druk, en dan vra U nog: Wie het aan My geraak?” 32 Hy het rondom Hom gekyk om te sien wie dit gedoen het. 33 Die vrou het geskrik en gestaan en bewe, want sy het besef wat met haar gebeur het. Sy het toe voor Hom op haar knieë kom val en vir Hom haar hele geskiedenis vertel. 34 Daarna sê Hy vir haar: “Dogter, jou geloof het jou gered. Gaan in vrede. Wees vir goed van jou kwaal genees!”

Baie keer dink ons as gelowiges, ons is nie waardig om genade te ontvang nie. Dit is asof ons, soos die Joodse vrou, dink dat ons slegs waardig genoeg is om net gou, sonder dat iemand ons sien, aan Jesus se kleed te vat en hoop ons word genees. Maar dit is juis dan wanneer ons moet besef dat ons waardig is. Nie omdat ons dit verdien nie, maar omdat God vol genade is. In die Joodse kultuur sou iemand soos hierdie wat bloeding het, gesien word as onrein. Iemand met wie jy nie in aanraking mee moet kom nie, anders is jy ook onrein. Sy sou uit die gemeenskap gestoot word en as vuil behandel word.

Dit is juis hier waar sy in haar desperaatheid vra: “Wie gaan my help en bystaan?” waar ons sien dat Jesus genade bewys en haar genees. Net so is dit met ons: God sien ons nie as iemand vuil wat weg van Hom beweeg nie, nee, Hy bewys eerder guns aan ons of ons dit verdien, of nie. Daarom moet ons onsself afvra: “Is daar dalk iemand wat ek wegstoot van Jesus omdat ek besluit het hulle is nie genoeg nie?”, en onsself herinner dat God hulle ook liefhet.

’n Invloedryke lewe is ’n leefstyl wat genade bewys aan almal, waardig of onwaardig.

Gebed:
Here, help ons om nie verby ander te kyk nie, maar hulle raak te sien. Mag onverdienstelike genade deur ons vloei

Liefde Doen:
Neem in hierdie week ’n oomblik waar jy aan die mense in jou lewe dink. Vra jouself af of daar dalk iemand is wie jy weggestoot het, omdat jy gevoel het hulle is dit nie waardig nie. Bid dan vir daardie persoon en vra dat God jou help.

ONVERDIENSTELIK
Week 3

Saamgestel deur: Cecil van der Merwe en Ziandri Jacobs

MEMORISEER VERS

Luk 17:10 (nlv)
Dit moet julle gesindheid ook wees. As julle alles gedoen het wat god van julle gevra het, moet julle sê: ‘ons is net dienaars wat eintlik niks verdien nie. Ons het maar net ons plig gedoen.'”

DOEN EERSTE – Week 2 Dagtukkies pdf

DOEN EERSTE
Dag 5

Hand 20:35 [nlv] Ek het julle in alles getoon dat ons deur so te arbei die swakkes moet help en die woorde van die Here Jesus moet onthou, dat Hy gesê het: Dit is saliger om te gee as om te ontvang.

Daar is ’n vreugde en ’n vervulling en ek wil by sê: “’n heel word” deur eerste te doen. Daar is iets in die momentum van ’n INVLOEDRYKE lewe wat nie net vervulling bewerk nie, maar lewensvreugde!

Daar is min dinge wat soveel energie losmaak as mense wat stap en ander eerste groet, mense se lewens raak leef, aksie neem en trajekte van ander se dag en lewens verander. Die woorde waarna in die gedeelte van Jesus verwys word, praat van ’n nuwe manier van lewe. Ek haal die Engelse vertalings moontlikhede aan omdat dit omskrywend is (happy, to be envied, and spiritually prosperous—with life-joy and satisfaction in God’s favour and salvation, regardless of their outward conditions)

Dit is ’n manier van lewe wat God se hart en wese aan mense om ons sal openbaar. Die “Saliger om te gee” het dan ’n INVLOED nie net op my nie, maar op die atmosfeer om my en die lewens wat deur my eerste doen, geraak word.

Ons kan deur eerste te doen ons lewenswêreld transformeer en ’n gemeenskap, een vir een, dag vir dag, om ons raak leef met die liefde van God.

Memoriseer genade!!

Gebed:
Here, hier is my lewe, my hande, my voete en beslis my hart! Gebruik my en doen in en deur my eerste!

Liefde Doen:
Kies ’n persoon, ’n gesin, ’n projek en meld aan en doen!

DOEN EERSTE
Dag 4

Jak 2:19-20 [nlv] Dink jy steeds dis genoeg om net te glo dat daar een God is? Wel, die demone glo dit ook – en hulle sidder, so bang is hulle! Jou dwaas! Wanneer gaan jy eendag besef dat geloof wat nie dade word nie, nutteloos is?

Soms is my gevoel dat die kerk in die algemeen goed doen met die “Ek Glo” gedeelte, maar minder goed vaar met die “ek doen” gedeelte. Ek moet nie net glo in Hom wat my deur Sy liefde gered het nie, maar ek moet doen wat Hy my beveel om te doen. Om INVLOEDRYK te lewe en die wêreld om ons raak te leef, moet daar momentum vanuit ons lewens plaasvind.

Ons kan nie bely dat God liefde is en dink dat Hy anders as Sy wese in en deur ons sal werk nie. Ons moet liefde word om liefde eerste te kan doen. Mense wat liefde word, doen dit. Hulle neem pragtige patrone van INVLOEDRYK doen vir hul lewens aan. Hulle vul hul lewens met praktyke en gewoontes wat liefde, aanvaarding, genade, vrygewigheid en vergifnis kommunikeer.

Mense wat liefde word, herhaal hierdie aksies so dikwels dat hulle nie eers besef dat hulle dit meer doen nie. Dit is vir hulle net vingergeheue. Hulle het niemand nodig om vir hulle hande te klap nie. Hulle het nie bekragtiging nodig vir dinge wat hulle weet inherent reg, waar en mooi is nie. Hulle het nie al die toekennings nodig wat met erkenning gepaard gaan nie. Hulle voel ook nie ’n behoefte om mense te kritiseer wat ’n paar dinge verkeerd gekry het, of ’n paar suur akkoorde in hul lewens getref het nie. Hulle bly beweeg en doen. Niks stop hulle nie, want liefde wat doen kan nie gestop word nie. Die kruisdood kon dit nie regkry nie.

Ek het altyd gedink om ‘n gelowige te wees, was genoeg, maar nou weet ek dat Jesus wil hê ek moet deelneem, maak nie saak in watter toestand ek is nie.

Gebed:
Here help my dat liefde, eerste doen, die ritme van my lewe word asseblief. Amen.

Liefde Doen:
Waar kan ek intensioneel ritmes van doen aan die gang sit in my lewe?

DOEN EERSTE
Dag 3

Luk 10:33–34 [nlv] “Toe het ’n veragte Samaritaan verbygekom, en toe hy die man sien, het hy hom innig jammer gekry. Die Samaritaan kniel toe langs hom, behandel sy wonde met medisyne, en verbind dit. Toe het hy die man op sy eie donkie gehelp en hom na ’n herberg geneem en daar verder versorg.

Om eerste te doen, moet ek teenwoordig (present) wees. Hierdie is werklik die verhaal van liefde sien, nie net raak, hand opsteek, is in die omgewing nie, maar doen

Jare gelede tydens my studies by RAU moes ons ’n aantal klasse bywoon om eksamen toelating te verkry. Ons vriend Andrew het daarmee gesukkel aangesien hy saans erg gekuier het. Ons het hom op ’n kritieke dag saamgeneem na die Etiek klas toe, omdat hy nie eksamen toelating sou verkry as hy daardie dag sou misloop nie. Hy het op die vloer gelê tot sy naam genoem was. Hy het sy hand bokant die tafel uitgelig en geantwoord: “present but horizontal”. Ons het geskater van die lag en besef dit beteken nie veel nie.

Ons is soms in die doen eerste teenwoordig, maar nie regtig daar nie. Ons gee geld, maar doen self niks nie. Het ’n opinie maar daag nie op, op die impakvolle tye nie. Ons moet oefen om werklik teenwoordig te wees. Nie uit opdrag of gewete nie, maar met hart en siel. Dit is wat liefde doen. Jy doen meer as om net jou hand op te steek.

Jy kyk, jy luister en jy hoor met die liefdeshart van God binne jou, om ander om jou se nood en gebrokenheid met God se liefde nie net raak te sien nie, maar te dien en eerste te doen.
Die lewe van Job is verander toe hy vir sy vriende begin bid het. Job 42:10 [nlv] En die HERE het die lot van Job verander toe hy vir sy vriende gebid het; en die HERE het Job se besittings vermeerder tot dubbel soveel as voorheen.

Ons kan verwag dat ons lewens getransformeer sal word wanneer ons INVLOEDRYK liefde begin doen, deur werklik nie net waar te neem nie, maar toe te tree. Nie die “goedkoop” “ek bid vir jou” nie.

I used to want to fix people, but now I just want to be with them. – Bob Goff

Gebed:
Here help my deur U Gees om nie net my hand op te steek nie, maar ’n impak te maak deur te doen! Amen.

Liefde Doen:
Vra die Here by wie moet jy gaan teenwoordig wees, omdat hulle meer as net ’n “ek bid vir jou” nodig het.

DOEN EERSTE
Dag 2

Luk 6:27 [nlv] Maar as julle gewillig is om te luister, sê Ek julle moet julle vyande liefhê. Doen goed aan dié wat julle haat. Seën dié wat julle vervloek. Bid vir hulle wat julle seermaak.

Die minder maklike pad is om na dié te kyk wat nie op my gunsteling lysie is nie. Dit is die mense wat ons kultuur ons leer om van weg te skuif, weg te stap van en op ons fone te blok en nie by stil te staan nie.

Deur ’n “doen eerste” kultuur aanpassing in my lewe te maak, begin ek eerste vir die wat nie op my gunsteling lysie is, te bid. Van die gebede kan sukkel met inhoud aan die begin. Soms wil ek in die gebedstye eerder oor hulle kla en aan die Here voorskryf wat Hy met hulle moet doen en hoe Hy hulle uit my lewe moet afsny.

Ons weet dat die Here in genade dit nie doen nie en dat as ons die fokus in die rigting van genade draai, begin Hy in ons harte werk tot voordeel van Sy koninkryk. Dan kan my lewe in die eerste plek getransformeer word om “die” mense deur God se oë te begin sien, om deur Sy liefde geraak te word. Ek word die draer in my binnekamer van God se genade. Daar waar ek vir “hulle” bid, word in die eerste plek my hart aangeraak. As my hart geraak word en my oë verander word en ek begin seën en bid vir “hulle” begin my leefwêreld God se veld word waar Hy INVLOEDRYK deur my lewe mense kan aanraak.

Dan kan ek uit my binnekamer begin beweeg na ’n gebroke wêreld om my en liefde doen.

Ek was vroeër bang om te misluk in iets wat regtig vir my saak gemaak het, maar nou is ek meer bang om sukses te behaal met dinge wat nie saak maak nie.

Gebed:
Here verander my hart sodat ek vir die mense op my nie-gunsteling lysie opreg kan bid. Begin vandag by my asseblief. Amen.

Liefde Doen:
Trek opreg jou “nie-gunsteling” lysie op en begin in jou binnekamer vir hulle bid, totdat jy hulle lewens met God se liefde kan begin aanraak.

DOEN EERSTE
Week 2 – Dag 1

Matt 7:12 [NLV] “Doen vir ander alles wat julle graag wil hê hulle vir julle sal doen. Dit is die kern van alles wat die wet en die profete van julle vra.”

Ons antwoord in ons harte vandag die vraag: “Wat sal jy graag wil hê dat ander vir jou moet doen?”

Ons leef in ‘n verbruikers georiënteerde wêreld. ’n Wêreld van: “Wat is in dit vir my?” In ons INVLOEDRYKE leefwêreld in die koninkryk van God kyk ons anders na ons leefwêreld. Dit is ’n leefwêreld wat na buite en ander kyk. Dit is ’n leefwêreld wat my daagliks uitdaag om, wanneer ek eerder op myself wil fokus en wag dat die lewe om my gebeur tot my eie voordeel, om Jesus se vraag gereeld aan myself te vra. Wat sal ek graag wil hê moet aan my gedoen word?

Om my eie selfgesentreerdheid te takel, begin ek vandag deur die vraag gereeld in my hart te beantwoord en dan daardie antwoord na ander te leef. Dit is lewensveranderend! Dit verander my hart van verbruiker na gewer en doener. Dit is hoe Christus geleef het. Hy het gedien en onselfsugtig Sy lewe gedeel met die mense om Hom.

Deur eerste te doen, skep ons nie alleen ’n ander atmosfeer om ons nie – ons raak lewens aan wat dalk in die donker van selfgesentreerde nood en angs vasgevang is. Daar is mense om ons wat nie hoop het en beslis nie die vermoë het om uitkomste en die dien van ander raak te sien nie.
Deur eerste te doen, begin ons ’n nuwe momentum van lewe. ‘n INVLOEDRYKE lewe van liefde wat doen.

Wanneer jy wens dat iemand anders iets vir jou as mens moet doen, dan is Jesus se raad eenvoudig: “doen eerste”

Gebed:
Vader, help my om my oë weg van myself en my eie begeertes te draai en U hart vir ander raak te sien en eerste te doen. Amen.

Liefde Doen:
Wie se lewe kan ek vandag raak?

DOEN EERSTE
Week 2

Saamgestel deur: Danie Lodder

MEMORISEER VERS

Rom 12:10–11 [nlv]
As broers en susters in God se huisgesin moet julle mekaar in liefde koester en voor in die ry staan om mekaar met respek te hanteer. Moenie sleepvoet wees in julle toewyding